ANGIL U MANGIL
ARÊDAYOĞ: ŞEYMA ARGIN
Cêk biw cêk çiniw. Yok bızyê Hal biv. Bızyê Hal bızyekon ana. Yok numê ya Angıl, yok numê ya Mangıl. Yo ruaj bızyê Hal vona:
-Angilêm, Mangılêm, e ha şına, çerena. Ber çoy ir ameker hatu e bi.
Bızyê Hal ki ra vejyena. Verg ber cenon. Angıl u Mangıl von:
-Tı kum a?
Verg von:
-Ez dayê şıma wa. Ber akerên.
Angıl u Mangıl von:
-Nê! Sot daa ma ina niyo.
Verg şın, hunci yon, von ber aker. Angıl u Mangıl von:
-Nê! Cil dayê ma ina niy.
Verg şın, hunci yon. Herçi xu kon zê ay dayê yi. Ber cenon, von:
-Angıl u Mangıl ber akerê! Ez dayê şıma wa.
Angıl u Mangıl ber kên a. Verg ca wurdon yo piron id wen.
Bızyê Hal şına, çerena, yena, vona:
-Angilêm Mangılêm! Ber aker! Angıl u Mangıl ra sot nivejyon. Sare dona ber ır, ber kena a. Şına zerrı. Ni Angıl a, ni Mangıl a.
Vaz dona vêr bêr. Bermena. Wurzena pay, şına vêr bêr heş. Vêr bêr yi ra şin sêr bon yi. Xu erzena wu. Pay dona ard ir, vendona heş.
Heş qêron, von:
-O kum bon mı şon we? Tuez toprax kon min yemêk mı?
Bizyê Hal vona:
-Ez bizyê Hal a. Dayê Angıl u Mangıl. Tuit mi tu wêrd heşo?
Heş von:
-Nê! Cê ki mi d' ki lui ost. Şu oy ra pers!
Bızyê Hal şına sêr bon lui. Lui z' qêron, von:
-A kum a ki mı şo we?
Bızyê Hal vona:
-Ez bızyê Hal a. Luiyê! Tuit mi tu wêrd?
Lui vona:
-Nê! Mi niwêrd. Cê ki mi d' ki vêrg est. Şu oy ra pers.
Bızyê Hal şına ki vêrg. Şına sêr bon, xu erzena wu. Qêrena, vona:
-Vergo vergo! Ez bızyê Hal a. Dayê Angıl u Mangıl a. Tuit mi tu wêrd?
Verg von:
Ê. Mı wêrd. Se biyo?
Bızyê Hal şına zerrı. Tê don piyor. Vona:
-Ma şin şer'at.
Verg von:
-Tamom.
Sêrsay diyon. Bızyê Hal xu gena. Şıt, mast, ron, tontur, du kena torbı. Şına şer'at. Çikê vêrg çin. Verg iz sıl, pışkıl ari kerd torbi xu. Şı şer'at. Wurd hemı z' şin cê Mallê. Torbê xu don mallê.
Malla person, von:
-Dêrd şıma çıto?
Dayê Angıl u Mangıl vona:
-En verg tuit mi wêrd.
Malla verg ra person, von:
-Rast a?
Verg von:
-Ê!
Malla von:
-Tu çı wêrd?
Verg von:
-E vêşon iv. Mı ay ra wêrd
Malla von:
-Tamom.
Malla verg ben yo wadı. Bızyê Hal ben yo wadı. Dinonon vêrg uncon.
Esteron bızyê Hal ken tuj. Yın wadon ra vejon. Von:
-Piyor dên!
Verg çarnon nieşkon bız. Bız esteri xu kena pizê vêrg ir. Pizê yi dıryon.
Angıl u Mangıl tera vejyên. Vaz don şin cê dayê xu. Bızyê Hal bena şa.
Tuton xo gena şına ki.
Malla z' pizê verg derzon. Ena mesla ra pey verg ibret gon. Hin zırar çoy nidon.
